أبسط 8 طرق عشان “متفلسش” آخر الشهر » sarkariaresult

JOIN NOW

في البداية، خلينا نتفق، إن الحياة هتبقى أسهل بكتير، لو بنعرف ندير مرتبنا بشكل كويس. في العادة، بتأثر عاداتنا اليومية، على نسبة الفلوس اللي بتتبقى معانا آخر الشهر، وهل هنقدر نحوش أو لأ، وهل هنستلف ولا لأ؟ وبما إن معظمنا على آخر الشهر بيكون مفلس خلص، فكرنا نتكلم عن 10 طرق بسيطة ممكن تساعدك في إنك متفلسش آخر الشهر. تعالوا نشوف!

جهز ميزانية للشهر

كتير من الناس مبيحبوش فكرة انهم يجهزوا ميزانية، لأن الموضوع بالنسبة لهم بيكون ممل ومعقد، ومحتاج انك تحدد مصاريفك خلال الشهر هتكون في ايه، وجمع وطرح، وده اللي بيخلي ناس كتير تفضل انهم ميعملوش ده. ولكن، عن تجربة، انك تجهز حتى لو ميزانية بسيطة، ده هيساعدك في إنك متفلسش آخر الشهر.

استخدم الميزانية

احنا عارفين اننا قلنا إنك تجهز ميزانية للشهر، ولكن للتأكيد، الميزانية دي مش بنجهزها ونركنها ومنعملش بيها حاجة، ولكن بنجهزها عشان نستخدمها. عشان كده، كل ما تفكر تشتري حاجة، ارجع للميزانية، شوف هل في مساحة لده ولا لأ، وصدقني الموضوع ممكن يكون رخم شوية في البداية، لكن مع الوقت هتتعود، والموضوع هيبقى بسيط ومش معقد.

سيب مساحة للحاجات الطارئة

لما تيجي تجهز ميزانية الشهر، انت محتاج تحدد الفلوس اللي هتتبقى في نهاية الشهر، ومن الفلوس دي حدد نسبة معينة، تقدر من خلالها تتصرف في أي حاجة طارئة ممكن تحصل، وده شيء ضروري، لأن مينفعش تخلي الميزانية معمولة بالظبط، ومفيش مساحة تتحرك فيها، لأن بنسبة كبيرة لو عملت كده، مش هتقدر تلتزم بالميزانية.

النفقات

معظم الناس، تقريبًا، بيقدروا يحافظوا على الميزانية في أوقات معينة، وفي أوقات تانية مبيقدروش يسيطروا على الوضع، وعشان كده، انت محتاج تحدد ايه الأماكن اللي لما بتروحها بتصرف فلوس كتير، وعليه هتقدر تقرر، هل تقدر تستغنى عن الأماكن دي ولا لأ، أو تحدد حد أدنى وحد أقصى للصرف هناك، ودي يمكن حاجة مهمة محتاج تاخد بالك منها.

مصاريف شهرية ثابتة

خلينا متفقين، ان لو الميزانية متسمحش بمصاريف ثابتة كل شهر، زي قسط أو قرض، فيفضل متاخدش الخطوة دي، عشان ميحصلش ضغط عليك آخر الشهر وتضطر تستلف أو تلاقي نفسك مفلس آخر الشهر. وفي النهاية القرار، قرارك، حدد هل ده مناسب ليك ولا لأ، وهل مناسب لنمط المعيشة بتاعك ولا لأ.

اشتري بأفضل الأسعار

واحدة من أهم وأبسط النصايح، اللي ممكن تساعدك انك متفلسش آخر الشهر، هي انك تتأكد انك بتشتري بأقل الأسعار للمنتجات والخدمات، انت محتاج تشوف، الأماكن اللي بتقدم خصومات وبدايل أرخص، ودي تعتبر نصيحة مهمة، ناس كتير بتتجاهلها، على الرغم انها ممكن توفر فلوس أكتر ليك.

فكر هتشتري ايه الأول

بمعنى؟ مبدأيًا، فكرة انك تحدد هتشتري ايه الأول، وتجهز قايمة طويلة بالحاجات اللي انت محتاجها، ده هيساعدك انك تراجع القايمة دي أكتر من مرة، وتبتدي تحدد هتحذف أو هتضيف ايه، بعكس انك تشتري الحاجة بسرعة، اللي في العادة بتكون قرارات (متهورة) بتندم عليها آخر الشهر.

قلل من مشتريات بطاقة الائتمان

في البداية، خلينا متفقين، انك تشتري حاجات كتير على بطاقة الائتمان، دي من أسوأ الحاجات اللي ممكن تعملها، وده ليه؟ اللي بيحصل، انك بتلاقي المرتب قرب يخلص، فتبدأ تفكر في بطاقة الائتمان. ونصيحتنا هنا، انك تحاول تقاوم الموضوع، ومتشتريش حاجات مش هتقدر تتحمل تكلفتها بعد كده، خاصةً لو مش حاجة ضرورية أوي.

في النهاية، خلينا نقول، انك تدير مرتبك بشكل كويس، ده هيخليك متفلسش آخر الشهر، وهيخليك عند استقلالية مالية، ولكن لازم تعرف إن الموضوع محتاج تدريب، ممكن متنجحش أول شهر أو حتى التاني أو التالت، ولكن بعد ما تاخد على موضوع انك تجهز ميزانية، تأجل بعض الحاجات اللي عايز تشتريها، هتكون عادة في حياتك، وبالتالي، الموضوع هيبقى بالنسبة لك أسهل.

قولنا في التعليقات، لو عندك نصيحة معينة قدرت عن طريقها تدير مرتبك بشكل كويس؟

This post is auto generated. All Materials and trademarks belong to their rightful owners, all materials to their authors. If you are the owner of the content and do not want us to publish your articles, please contact us by email – [email protected] . The content will be deleted within 48-72 hours.( maybe within Minutes)